Para sa Minsa’y Naroroon

image of a house fence overlooking a mountain view

Tatawid ng mga bayan, ilog at mga bundok para makamit ang hangad/ http://www.123rf.com

 

 

 

 

 

 

 

Kung para sa pag-ibig, binagtas mo ang limang kilometro

Sa gitna ng ulan at mga paghuhuramento ng kulog

Nagngangalit ang langit, tila mga ulap, pinupunit

Sa maputik na daanan sa isang tagong kabukiran

Kung para sa pag-ibig, tinawid mo ang humuhugos na ilog

Patalun-talon sa mga higanteng batong-buhay

Umakyat ng tatlong bundok

Na nagwawalay sa bahay ng kanyang ama

Mula sa lansangang hintuan ng bus sa isang bayang patay

Kung para sa pag-ibig sa kanya, nagtiwala ka sa di-kilala

Lango sa tuba, siyang sa iyo ay naggiya

Nagbitbit ng iyong bag, kapalit ay munting salapi

Habang suot ng iyong mga kamay, sapatos na sapin

Noong isang hapon ng kawalang-katiyakan

Habang papagapang na ang gabi

At di mo alam kung may hahapunanin

(Kung wala, magpapalala sa asim ng sikmurang sadyang karamdaman)

Sino’ng makapagsasabi

Kung iyon ay katapangan o kawalan ng ingat?Β 

At hindi mo kayang kalasin

Tulad rin ng pagtandang di kayang pigilin

Ngumiti ka, talos ang pagpaparaya ng panahong nagpapalimot

Anuman yaong labas sa pag-ibig na pumukaw sa iyo

At sa bundok na niyayapakan ng iyong mga paa.

Nilupig ng ulan ang alikabok ng tag-araw

Malugod mong tinanggap maging ang pangangaligkig ng katawan

At kung saan ang hapong kalamna’y dapat mamahinga

At damhin ang kaigayahan

Ng isang larawang kalahati pa lamang ang hugis,

Ang diwa ay marapat na magpatuloy

Sundan ang katotohanan hanggang sa dulo ng bangin – at malaman:

Wala siya sa tahanan ng kanyang ama.

Ang umuugong at nag-aalburutong ulan

Marahil ang nagsabi sa iyo

Ang paghihintay ay mauuwi sa wala,

Subalit hinintay mo siya ng buong gabi.

Ang iyong nalinlang na paghahangad

Pinagkamalan ang bawat hampas ng ulan

Na tunog ng kanyang mga hakbang.

Sa dilim ng gabi, wari

Ay pagaspas yaon ng saya niyang basa ng tubig

Mula sa mga sangang ipinugong ng gabi

Ang pormal at malinaw ang matang kwago

Nag-anunsyo noong pagdatal ng sandali.

Naiwan kang tanging labi ng baga ng pangarap ang kapiling

Upang noo’y mabatid, kasabay ng ulan

Ang pagtatapos ng takas na tag-araw. πŸ™‚

 

image of sun rising by early morn

Darating ang mga sinag ng umaga, matapos ang nagpupuyos na ulan ng gabi/ zzanyy.blogspot.com

 

 

 

 

 

 

 

 

– Ika- 4 ng Hunyo 2013

Salin ng tula, To One Who Was There

ng makata, Ginoong Anthony Tan

 

* Ang tula ay unang isinalin at inilathala ni thoughtpick o LJ de leon sa kanyang blog noong ika-9 ng Mayo 2013, may pamagat naΒ Para sa Minsa’y Naroroon. Nabasa yaon ni ssa at hiniling niya kay ka-blog, ilathala rin sana niya ang orihinal na English version…

Nang mailathala ni ka-blog ang sipi ng To One Who Was There, nabasa ni ssa at naisipang gumawa rin ng sariling salin, hala pa… Nagawa naman (ang kopya ay nasa itaas). Ayon lang, ang layo sa ganda at husay ng original, ahihi. Paanong gagawin? πŸ™‚

At, di hamak, mas mahusay ang salin ni ka-blog LJ. Mas maalam tumula ang ka-blog na ito sa ‘kin, sabihin ko sa inyo. Siya na ang nakakaalam – ano ang desire, hihihi. Di nga, pansinin at pagkumparahin ang dalawang translation, lalo sa bahaging pagaspas ng saya, ahihi.

Mas maganda ang kanyang salin. Mas alam niya, sya na… At kung tutuusin, iyon wari ang heart ng composition – Β Paano ang pakiramdam ng isang naghahangad? Tila lahat ng bagay ay pumapatungkol sa iniibig. πŸ˜‰

 

Maligayang Buwan ng Wika, mga kapatid, ka-blogs, kababayan… πŸ™‚

 

 

 

Advertisements

Salansan

 

maayos na sana – ang salansan

nitong mga buhay nating hiram

kung hindi nga lang nakialam

‘tong makulit na si kapalaran.

 

image of a cluster of neat desks

May mga salansan na raw na nakasanayan ang bawat tao/ housingtouri.com

 

gigising sa umaga, araw paghahandaan

papasok sa eskwela, dili kaya, sa tanggapan

matapos ang ilang hikab, manananghalian

uupo uli sa hapon, hanggang sa uwian.

 

walang ibang bago, iyon pa rin ang meryenda

kung may tsismis, tungkol sa politiko’t artista

walang ikinatatakot, wala rin namang kaba

maliban sa trapik at kung mahaba kaya ang pila.

 

image of traffic in a street in Makati City

Problema sa araw-araw ang trapiko sa lungsod/ infohiway.net

 

ngunit isang araw, bigla kang dumating

simpleng pagbati, iyong ipinarating

ngiti ang nakita, sa pag-angat ng tingin

‘yon na pala ang umpisa, ano’t di napansin?

 

bakit walang nagsabi, buhay maaring guluhin?

ng kapirasong kaway o mumunting bilin

bakit walang nagpayo, yaring puso’y pigilin?

tuluy-tuloy sa bitag, diretso kamo sa bangin.

 

ayan na nga po, puso’y humihiling

ako sana, ako sana – ang iyong piliin

ang iyong mga mata, sa akin ipaling

pagsuyo ko’y wagas at pagkalalim-lalim.

 

namamalikmata ba ako, sa aking nakikita?

pagtatangi mo’y sa akin, hindi para sa iba

buhay kong nagulo, eto at anong saya

di na bale, nakakasuya man – meryenda.

 

tila bigay ng langit ang mahabang pila

oras para sa kwentuhan, mga biro at tawa

magpakilala sa iyo, makilala rin kita

maghawakan ng kamay, dalawang magsinta.

 

image of two young lovers dreaming

Pinag-uusapan ng magkasintahan ang bukas na sila ay magkasama pa rin/ grayowlpoint.com

 

may mga panahong tayo’y nangangarap

kung ano na ang bukas, atin ang hinaharap

kasama pa rin kita, tayo’y magsisikap

umulan man o umaraw, dumilim man mga ulap.

 

ngunit isang araw, suliranin ay dumating

walang pasintabi, gulong ay napakatulin

sinalikop tayo, niyong malakas na hangin

mahina pala ang hulog – ng pag-ibig natin.

 

naiwan akong nakatungo, umiiyak ng taimtim

mabibigat ang iyong hakbang palayo sa akin

ang pagmamahalan pala, kahit ano’ng gawin

bibigay rin ang tikas – pag takda na at taning.

 

image of a not so neat office desk

Mahirap rin nga bang guluhin ang nakasanayan na?/ ehow.com

 

naiinip ako sa babasahing binubuklat

buhay ng politiko’t artista ang isinisiwalat

iniisip ko – kung di ka dumating at lahat

trapik lang kaya, ang problemang mabigat? πŸ˜‰

 

* Mahigpit na tagubilin para sa mga hihiram at kokopya nitong tula (buo man o bahagi lamang) para sa online publication (Facebook, Tumbler, StumbleUpon, Twitter at iba pa) na kilalanin at ilagay ang pangalan nitong source website at maglagay din ng link o URL pabalik dito. Para naman sa mga nagnanais hiramin, kopyahin at/o ilimbag ito sa hindi online na media, mangyaring sumulat muna sa sasaliwngawit@yahoo.com.

Ang piyesang ito ay Copyrighted. Ipinapaalala rin, masamang ugali ang magpalabas at magpalusot ng sulatin bilang sariling gawa gayong hiniram, pinitik o ni-nenok lang sa iba, ahaha. πŸ˜‰

 

** Ang tula nga pala ay handog sa mga ka-blogs na mahihilig at mahuhusay na gumawa ng mga sulating – sanaysay man o tula – ukol sa buhay pang-araw-araw. Everyday scenes, kumbaga – mga istoryang pantabi-tabi, pangkaraniwan at tipikal, ‘ika nga. May Β twist ng pag-ibig para may konting kilig, ahihi… ^^

 

*** Mga kapatid, may tanong tayong malupit ,Β “Ano nga ang nagagawa ng pag-ibig?” πŸ˜‰